Sumaropnun í Laufási 1. júní

Gamli bærinn í Laufási opnar dyr sínar upp á gátt laugardagin 1. júní kl 9 og býður velkomna alla þá gesti, innlenda og erlenda, sem leggja land undir fót í sumar.  Sunnudaginn 2. júní er tilvalið að gera sér ferð í Laufás því kl 14 til 16  verður handverksfólk úr Þjóðháttafélaginu Handraðnum að störfum í Gamla bænum og starfsfólk Pólarhesta koma með hesta og teyma undir ungum gestum á flötinni.   Ungir sem aldnir geta svo sest niður eftir góðan dag í Kaffi Laufási með þjóðlegt bakkelsi og yndislegt útsýni yfir fjörðinn.   Gamli bærinn í Laufási er í umsjón Minjasafnsins á Akureyri en í eigu Þjóðminjasafns. Gamli bærinn í Laufási er opinn í sumar daglega frá kl 9-17 til 1. september.