Gásagátan
Gásagátan er í senn spennusaga og söguleg skáldsaga. Sagan gerist árið 1222, í upphafi Sturlungaaldar þegar hefndin er enn lykilhugtak í íslensku samfélagi þótt landsmenn séu orðnir kaþólskir og kirkjuræknir. Söguhetjur eru bræðurnir Kolsveinn og Kálfur, ungir Grímseyingar sem koma til Gása í mikilvægum erindagjörðum. Strákarnir eiga harma að hefna eftir föður sinn en þeir ætla sér líka að verða ríkir og þar kemur dularfullur kassi við sögu. Á Gásum kynnast bræðurnir krökkum sem síðar verða þekktir þátttakendur í róstum Sturlungaaldar; Sturlu Þórðarsyni og Þórði kakala. Þeir hitta líka frægt fólk eins og Snorra Sturluson, Guðmund biskup Arason og Sighvat á Grund.
Þrettánda öldin er tími mikilla átaka og endaloka þjóðveldisins, en líka ritunartími Íslendingasagnanna. Þessu tímabili ber að gera skil á miðstigi grunnskólans skv. aðalnámskrá. Gásagátan getur lokið upp dyrum að þessum tíma og gefið börnum færi á að upplifa fornt samfélag með augum jafnaldra sinna. Slík persónuleg nálgun er mikilvæg þar sem innlifun og samsömum einkennir lestur barna á þessum aldri.
Gásagátan var rituð af Brynhildi Þórarinsdóttur í samstarfi við Gásakaupstað ses og Minjasafnið á Akureyri með styrk frá Menningarráði Eyþings. Markmiðið með rituninni var tvíþætt, annars vegar að vekja athygli á sögu Gása, mesta verslunarstaðar Norðurlands á miðöldum, og hins vegar að auðvelda börnum að upplifa Íslandssöguna á spennandi og skemmtilegan hástt. Gásagátan er því hugsuð fyrir skóla ekki síður en almennan markað og fylgja henni kennsluleiðbeiningar.
Brynhildur Þórarinsdóttir, er rithöfundur og lektor í barnabókmenntum við Háskólann á Akureyri. Gásagátan er áttunda barnabók Brynhildar sem hlotið hefur margvíslegar viðurkenningar fyrir bækur sínar. Hún hlaut íslensku barnabókaverðlaunin 2004 fyrir spennusöguna Leyndardóm ljónsins og fyrir endursagnir sínar á Íslendingasögunum Njálu, Eglu og Laxdælu, hlaut hún norrænu barnabókaverðlaunin 2007.