Iðnaðarbærinn Akureyri - ljósmyndasýning

Á Akureyri var ilmur af iðnaði. Á Hvannavöllum mátti finna lykt af súkkulaði, brenndum kaffibaunum eða brugguðu öli. Svo ekki sé minnst á peningalyktina. Allt eftir því hvernig vindurinn blés.

Iðnaður einkenndi bæinn um áratuga skeið. Í Grófargili var framleidd næring fyrir líkama úr mjólk þar sem nú er framleidd andleg næring í Listagilinu. Þar sem nú eru verslunarmiðstöðvar voru framleiddar ullarvörur og málning sem voru sendar um land allt og út fyrir landsteinana, .

Það voru nefnilega mikil sannindi í texta Kristjáns frá Djúpalæk sem hljómsveit Ingimars Eydal flutti svo eftirminnilega „Við höfum Lindu, við höfum KEA og heilsudrykkinn Thule, Amaro og SÍS …“.  Á Akureyri var hægt að fá allt sem þurfti fyrir heimilið og heimilisfólkið; fatnað, matvöru, hreinlætisvörur, gos og öl, húsgögn, málningu, innréttingar. Akureyringar voru stoltir af því að versla vörur sem framleiddar voru í bænum jafnvel af viðskiptavininum sjálfum.  Ef ekki þá örugglega af einhverjum sem viðkomandi þekkti.

Á ljósmyndasýningunni Iðnaðarbærinn Akureyri gefur að líta 130 ljósmyndir úr sögu fjölmargra en þó langt í frá allra iðnfyrirtækja sem hér störfuðu og starfa sum enn. Á sýningunni eru margar litmyndir en starfsfólk Minjasafnsins hefur gert allar litmyndir safnsins stafrænar síðustu mánuði.

Sýningunni er einnig ætlað að safna minningum og sögum þeirra sem unnu á þessum fjölbreyttu vinnustöðum. Í þeim eru ekki síður fólginn verðmæti sem vert er að safna. Sannarlega sýning þar sem bæði er hægt að hverfa aftur í tímann eða uppgötva Akureyri sem þú aldrei þekktir.

Opið daglega frá 13-16 og jafnframt verður opið á Iðnaðarsafninu á sama tíma næstu helgar þó unnið sé þar að breytingum.