Fréttir

Það verður hauststemning um helgina í Gamla bænum Laufási. Þar verður uppskera haustsins seld s.s. rófur og kartöflur, spennandi íslenskt krydd í fallegum gjafakössum, fjallagrös og fleira. Kaffi Laufás framkallar ilm af lummum og kaffi. Þetta er síðasta sumarhelgin í Laufási og upplagt að njóta síðsumars í ljúfu umhverfi.

Skáldahúsin á Akureyri, Nonnahús, Davíðshús og Sigurhæðir eru opin á Akureyrarvöku frá kl. 13-17. Ókeypis inn í dag. Lítið við og kynnist eða rifjið upp kynnin af skáldunum og skoðið heimili þeirra í leiðinni.Á Minjasafninu verður einnig frítt inn á laugardaginn.

Það var dulmögnuð stemning í fyrra á Draugaslóð. Kvæðamannafélagið Gefjun fór með kraftmiklar stemmur og kvæði.Athugið að ekki er um eiginlega göngu að ræða heldur fer fólk um Innbæinn frá Gamla spítala (gula húsið) að garði Minjasafnsins. Safnið verður ekki opið þar sem fjöldinn bar safnið ofurliði í fyrra.Gangið varlega um skuggaveröld Innbæjarins milli 22:30 og 23:30 á föstudaginn.Myndir frá því í fyrra.

Fylgist náið með okkur á facebook því nú líður að draugavöku. Innbærinn tekur á sig draugalega mynd milli 22:30 og 23:30 föstudaginn 26. ágúst n.k. Safnið verður lokað að þessu sinni. Hins vegar verður ýmislegt nýtt á ferli utanhúss. Fylgist með.

·        Það er óhætt að segja að Markaðsdagurinn í Laufási hafi tekist vel þetta árið. Talið er að um 600 manns hafi lagt leið sína  í Laufás. Það voru 15 söluaðilar með borð og voru með frábært úrval af handverki og matvöru sem gestir kunnu vel að meta. Snorri, Ragnheiður, Finnur og Ingi sáu um tónlistina sem hljómaði um svæðið, þökk sé þeim og öllum sem tóku þátt í þessu með okkur.  

Á mánudaginn kl. 13-16 verður haldinn markaðsdagur í Laufási í Grýtubakkahreppi. Á boðstólnum verður fjölbreytt íslenskt handverk eins og silfurmunir, prjónavara, snyrtivörur og matvara úr héraði ásamt ýmsu öðru forvitnilegu.  Í Laufási er rekið Kaffi Laufás sem býður upp á þjóðlegar veitingar. Laufás er 30 km. norðaustur frá Akureyri og er tilvalinn áningarstaður á leið austur á land.

Næstkomandi laugardag, 30. júlí kl. 14 býður Minjasafnið upp á gönguferð með leiðsögn. Farið verður í fótspor feðranna og gengið um elsta bæjarhluta Akureyrar,  Fjöruna, gömu Akureyri og allt norður að Torfunefi.  Gangan hefst við Minjasafnið og endar í Sigurhæðum, húsi þjóðskáldsins Matthíasar Jochumssonar, þar sem boðið verður upp á hressingu. Leiðsögumaður er Gísli Sigurgeirsson Innbæingur og sögumaður með meiru. Gangan tekur um 1,5 klst. Ekkert þátttökugjald. Tilvalið tækifæri til að fræðast um sögu elsta bæjarhluta Akureyrar og áhugaverða einstaklinga sem þar hafa búið í gegnum tíðina!  

Fimmtudagskvöldið 20. júlí kl 20 verður gengið um huldufólksslóð á Akureyri. Gengið verður  frá Hamarkotsklöppunum við enda Brekkugötunnar (rétt við styttu Helga margra og Þórunnar hyrnu)stundvíslega kl 20. Leiðsögumenn eru Hanna Rósa Sveinsdóttir og Hörður Geirsson starfsmenn Minjasafnsins. Allir velkomnir og ekkert þátttökugjald er í gönguna!

Þung högg eldsmiðsins og  háreysti kaupmanna í bakgrunni ásamt sverðaglamri kappsfullra fornmanna blandast hlátrasköllum barna  á MIÐALDADÖGUM  á Gásum í Eyjafirði 16.-19. júlí.   Á MIÐALDADÖGUM færist líf í Gásakaupstað sem var forn verslunarstaður á miðöldum. Handverksfólk, íklætt miðaldaklæðnaði, vinnur að smáhandverki, leikinn verður knattleikur, barist með spjót, kolagerð reynd, brennisteinn hreinsaður og margt fleira. Auk þess sem langskipið Vésteinn mun sigla innn fjörðinn og bjóða uppá siglingar. Leiðsögn verður um fornleifasvæðið.  Nánari upplýsingar má finna á www.gasir.is  Það eru Gásakaupstaður ses, Minjasafnið á Akureyri og Handraðinn – miðaldahópur sem standa að MIÐALDADÖGUM  2011.

Það voru um 400 manns sem lögðu leið sína á MInjasafnið til að skoða sýningar þess og fara í leiðsögn um sumarsýninguna Álfar og ´huldufólk með þeim Ingibjörgu H. Ágústsdóttur listakonu og Haraldi Þór Egilssyni safnstjóra. 300 manns ´sóttu Nonnahús heim og hátt á þriðja hundrað komu í Gamla bæinn Laufás. Við þökkum þeim fjöldamörgu sem til okkar komu kærlega fyrir heimsóknina.