Fréttir

Fjölskyldumorguninn í Hofi síðastliðinn sunnudag var vel sóttur. Um 80 börn hlustuðu á frásögn starfsmanna Minjasafnsins af hrekkjóttum og þjófóttum jólasveinum sem mömmur, pabbar, ömmur og afar þekktu þegar þau voru ung. Takk fyrir komuna í Hof.

Safnið er opið alla daga til 23. desember. Kíkið endilega inn á forvitnilegar og fjölskylduvænar sýningar safnsins. Við minnum sérstaklega á örsýninguna "Hvað var í pakkanum!-" sem og safnbúðina þar sem margt spennandi má finna í jólagjöfina til ástvina innanlands sem utan! 

Við viljum vekja athygli gesta okkar á fjölskyldumorgun í Hofi á sunnudaginn, 12. des kl 11:00. þá ætla þau Sirrý, safnkennari og þór að segja börnunum frá kenjum íslensku jólasveinanna sem oft voru meira en lítið þjófóttir! Verið hjartanlega velkomin.

Jólastemning mun ríkja sunnudaginn 5. desember kl 13:30 -16.00 í Gamla bænum Laufási. Þá verður hægt að fylgjast með undirbúningi jólanna eins og hann var í gamla sveitasamfélaginu. Jólastund verður í Laufáskirkju kl 13:30 þar sem yngri barnakór Akureyrarkirkju kemur í heimsókn og syngur jólalög. Í Gamla bænum verður laufabrauðs-, kerta- og jólaskrautsgerð auk þess sem hægt verður að æfa sig í púkki.Jólalegur kvæðasöngur Gefjunnar ómar um alla sveit. Í Gamla prestshúsinu verður handverk úr héraði til sölu ásamt ilmandi smákökum, kakói og kaffi undir jólalegum harmonikkuleik Evu Margrétar Árnadóttur. .

Opið alla daga frá 13-16 fram til jóla.Komdu og skoðaðu sýningar og líttu við í búðinni.Taktu jólamyndina í gamla ljósmyndastúdíóinu.Kíktu á örsýninguna Hvað var í pakkanum.

Á degi íslenskrar tungu, þriðjudaginn 16. nóvember, bjóða Nonnahús og Minjasafnið á Akureyri  í opið hús í Ketilhúsi fyrir stóra og smáa í tilefni af afmæli barnabókarithöfundarins og jesúítaprestsins Jóns Sveinssonar - Nonna. Frá kl 9:00-15:30 eru börnin sérstaklega boðin velkomin í Ketilhús og seinni part dags kl 16:30-18:00 verður afmælisdagskrá Nonna til heiðurs. þar munu þau Helga Birgisdóttir, doktorsnemi í bókmenntum, og Jón Hjaltason, sagnfræðingur, fjalla um ævintýri Nonna, uppvöxt hans og umhverfi.  Hlökkum til að sjá ykkur! 

Á laugardaginn er safnið opið kl 14-16. Fyrir áhugasama þá stendur ljósmyndasýningin FJÁRSÓÐUR -tuttugu ljósmyndarar frá 1858-1965- ennþá yfir. Aðrar sýningar safnins eru: Akureyri - bærinn við Pollinn og Eyjafjörður frá öndverðu. Ekki er úr vegi að minna á safnbúðina en þar má finna margt stórt og smátt sem vel á heima í tækifæris- og jólapakka. Hlökkum til að sjá ykkur. 

 Þar sem veðurútlit er vont á laugardag fellur dagskrá um Jóhann Bessason niður. Nánar auglýst síðar.