Fréttir

Jólastemning mun ríkja sunnudaginn 6. desember kl 13:30 -16.30 í Gamla bænum Laufási. Jólaundirbúningurinn hefst með fjölskylduguðsþjónustu í Laufáskirkju kl 13:30 þar sem sr. Bolli Pétur Bollason messar og einsöngvari er Óskar Pétursson.  Í Gamla bænum mun eldur loga á hlóðum og krauma í feitinni á meðan laufabrauðið er skorið og steikt. Hangikjötsilmur læðist um híbýlin og unnið verður að kertagerð. Börn á öllum aldri geta föndrað jólaskraut eins og tíðkaðist  þegar ömmur, afar, langömmur og langafar voru lítil börn. Hurðaskellir og Stekkjastaur koma í heimsókn.  Það er Laufásshópurinn ásamt fjölda annarra velunnara Gamla bæjarins sem gerir það mögulegt að hægt er að upplifa jólaundirbúning gamla sveitasamfélagsins á þennan hátt.Aðgangseyrir 500 kr fyrir 16 ára og eldri

Hér má finna kennsluleiðbeiningar við barnabókinni Gásagátan, sem gerist á miðaldaverslunarstaðnum Gásum hér í Eyjafirði. Brynhildur Þórarinsdóttir, barnabókarithöfundur,  skrifaði bókina með stuðningi Gásakaupstaðar, Menningarráðs Eyþings og Minjasafnsins gerði einnnig kennsluleiðbeinigar með bókinni fyrir áhugasama kennara sem vilja nýta hana inní skólakerfinu.Kennsluleiðbeiningarnar má sækja hér.

Á safninu er nú jólalegt um að litast. Á sýningunum Allir krakkar, allir krakkar - líf og leikir barna og Barnadraumar á Minjasafni  má nú sjá jólalega skólastofu og vel skreytt unglingaherbergi. Grenilykt og jólaljós taka nú á móti gestum okkar og jólavörurnar eru komnar í safnbúðina. Við erum með opið um helgar bæði laugardaga og sunnudag til 20. des kl 14-16.

Barnabókin Gásagátan eftir hinn vinsæla barnabókarithöfund Brynhildi Þórarinsdóttur er komin út. Af því tilefni var Katrínu Jakobsdóttur, menntamálaráðherra, afhent eintak af bókinni í gær á degi íslenskrar tungu og fæðingardegi barnabókarithöfundarins Jóns Sveinssonar – Nonna. Gásagátan var rituð í samstarfi við Gásakaupstað ses. og Minjasafnið á Akureyri með styrk frá Menningarráði Eyþings.

Afmælisveisla í Nonnahúsi í dag, mánudaginn 16. nóvember, milli kl 17 og 19 því  Nonni hefði orðið 152 ára þennan dag. Af því tilefni verða frummyndir Kristins G. Jóhannssonar úr Nonnasögunum í endursögn Brynhildar Pétursdóttur til sýnis. Auk þess mun Haukur Ingimarsson spila á hnappaharmonikku milli kl 17 og 18.  Verið hjartanlega velkominAfmæliskaka og notalegheit í tilefni dagsins! Nonnavinafélagið mun hittast í Zontahúsinu kl 16 og eiga notalega stund saman - nýjir félagar eru velkomnir!

Hefur þig langað til að kynnast starfi Minjasafnsins? Jafnvel fá að hjálpa til? Líttu við á Minjasafninu n.k. laugardag kl. 13 á kaffistofu safnsins. Hittu Stoðfélaga og líttu á gamlar ljósmyndir. Kannski þekkir þú einhvern á myndunum. 

Safnið er opið á morgun, laugardaginn 7. nóvember, frá kl 14-16. Nú standa yfir skammtímasýningarnar "Barnadraumar á Minjasafni" og "Allir krakkar, allir krakkar - líf og leikir barna". Auk þess eru á safninu grunnsýningarnar "Akureyri bærinn við Pollinn" og "Eyjafjörður frá öndverðu". Við minnum á safnbúðina! Verið velkomin!

Hvað vitum við um drauma barna? Barnadraumar á Minjasafni er sýning sem byggir á rannsóknum dr. Bjargar Bjarnadóttur sálfræðings hjá Draumasetrinu Skuggsjá. Á sýningunni er gerð grein fyrir flokkun barnadrauma en eru sýndar teikningar barna sem þau hafa gert af draumreynslu sinni bæði martröðum og öðrum draumum. Einnig eru svefntengdir munir til sýnis og ef einhvern syfjar þá er uppá búið rúm til taks. 

Það er lokað á safninu laugardaginn 17.október. Næst verður opið fyrsta vetrardag 24. október en þá standa STOÐ-vinir Minjasafnins fyrir forvitnilegum viðburði í tilefni dagsins.  Minnum á að opið er í Gamla bænum Laufási laugardaginn 17. október  frá kl 13:30 - 16 á meðan starfsdagur að hausti stendur yfir. Sjá nánar í auglýsingu hér fyrir neðan. 

Hefur þú séð hvernig kindahausar eru sviðnir? Hefur þú fylgst með alvöru sláturgerð? Hefur þú smakkað heimagerða kæfu, slátur, kartöflurúgbrauð eða fjallagrasamjólk? Ef ekki þá er tilvalið að leggja leið sína í Gamla bæinn í Laufási laugardaginn 17. október milli kl 13:30 og 16 til þess upplifa gamla tíð með öllum skynfærum. Tóvinnufólk verður að störfum og  forvitnilegur haustmarkaður verður í skálanum. Lummukaffi verður til sölu í Gamla prestshúsinu og ljúf tónlist verður leikin af fingrum fram. Dagurinn hefst kl 13:30 með góðri samverustund í kirkjunni undir stjórn sr. Bolla Péturs Bollasonar.