Fréttir

Takmarkað ljós, löng draugaleg göng og ýmis skúmaskot Gamla bæjarins í Laufási mynda tilheyrandi umgjörð fyrir þjóðlegar draugasögur og draugalegar rímur sunnudagskvöldið            14. febrúar kl 20:00.    Vegna takmarkaðs pláss þarf að tilkynna um þátttöku í síma              463-3196 eða 895-3172. Aðgangseyrir kr 600. Lummukaffi verður til sölu inni í Gamla prestshúsinu á eftir dagskrá í Gamla bænum.

Það eru fáir dagar sem setja jafn mikinn svip á bæjarlífið á Akureyri og öskudagur.  Í tilefni þessa skemmtilega dags hefur verið sett upp örsýning á Minjasafninu á Akureyri. Hún er hluti af fjölskyldusýningu safnsins Allir krakkar, allir krakkar  -  líf og leikir barna. Á sýningunni gefur að líta heimagerða öskudagsbúninga sem ýmist hafa verið lánaðir á sýninguna eða eru úr fórum safnsins. Sýningin verður opin á laugardögum frá kl 14 - 16 fram til 6. mars.

Í tilefni af opnun sýningarinnar "Allir hlæja á öskudaginn" verða Stoðvinir Minjasafnsins í Zontasalnum laugardaginn, 13. febrúar milli 14 og 16, en þar ætla þeir að sýna gestum og gangandi hvernig öskupokar og bolluvendir voru gerðir.

Minjasafnið á Akureyri, Punkturinn og Grasrót – Iðngarðar bjóða áhugasömum einstaklingum að koma saman og sauma eða breyta fötum fyrir öskudaginn laugardaginn 13. febrúar                frá kl. 10 – 16 í Zontasalnum, Aðalstræti 54 A. Á staðnum verður fólk til hjálpar sem saumað hefur ófáa búninga í gegnum tíðina.Trésmíðaverkstæðið í Iðngörðunum á Hjalteyragötu 20 (gamli Slippurinn) verður opið frá kl 10-16 fyrir þá sem þurfa að smíða tilheyrandi fylgihluti í tilefni af öskudeginum. Þar verða smiðir öllum til aðstoðar.  

Það er opið hjá okkur á laugardaginn kl 14 - 16. Örsýning sem sýnir öskudagsbúninga hefur verið skeytt inní sýninguna Allir krakkar, allir krakkar - líf og leikir barna sem var sumarsýningin okkar 2009. Verið hjartanlega velkomin. Spennandi hlutir gerast hjá okkur næstu helgi svo fylgist endilega með á heimasíðunni. 

Sýningar Minjasafnsins hafa vakið athygli blaðamannanna hins vel þekkta ferðatímarits  Lonely Planet. Í febrúarhefti tímaritsins er mælt með Akureyri sem áfangastað fyrir þá sem þegar hafa farið til stórborganna París, Róm og Madríd.  En nánar má lesa um þetta í febrúarheftinu á bls 15. 

Stoðvinir Minjasafnsins ætla að halda uppteknum hætti og hittast á laugardaginn kemur kl. 14-16 á kaffistofu Minjsasafnsins til að skoða myndir. Þekkja konur og karla sem á þeim eru, spjalla saman og fá sér kaffibolla. Ætlunin er að halda myndaskoðun áfram eitthvað fram eftir vetri. Skráið ykkur inn á  facebook síðu Stoðvina: http://www.facebook.com/group.php?gid=227496299822&ref=nf til að fylgjast með hvað um er að vera. 

Að venju er opið hjá okkur á laugardögum milli kl 14-16 yfir vetrartímann. Sýningartími fjölskyldusýningarinnar "Allir krakkar, allir krakkar - líf og leikir barna" hefur verið framlengdur en hún mun standa fram yfir páska! 

Að venju verður messað í Minjasafnskirkjunni 26. desember. Messan er kl 17 og allir eru innilega velkomnir. Prestur er sr. Svavar Alferð Jónsson og organisti Sigrún Magna Þórsteinsdóttir.