Fréttir

Það er ekki á hverjum degi sem grunnskólanemendur taka þátt í að búa til sýningu á söfnum. Nú er opnuð á Minjasafninu sýning sem er afrakstur verkefnis um Gásir sem nemendur í 6. bekk Giljaskóla unnu 2006-2007.Sýningin er öllum opin á laugardögum frá 14-16 til 24. nóvember.Nemendum í 4. og 5. bekk á starfssvæði safnsins verður boðið sérstaklega á sýninguna.

Það var glaðbeittur 80 manna hópur safnmanna sem heimsótti skoska vinnufélaga í Farskóla íslenskra safnmanna daganna 18-21 september sl. Farskólinn er árviss endurmenntunar og samvinnu vettvangur safnmanna.

Á laugardaginn er síðasti opnunardagur í Gamla bænum Laufási. Opið frá 9-18.

Nú fer hver að verða síðastur að sjá sumarsýningu Minjasafnins á Akureyri. Sýningin hefur gengið vel og gestir safnins hafa verið hrifnir af þeim dýrmætu gripum safnins sem prýða sýninguna. Síðasti sýningardagur er 15. september en opið er alla vikuna frá 10-17.

Það er alltaf gott að fá hrós og sunnudaginn 9. september 2007 færði  meðlimur í alþjóðráði safna okkur góðar kveðjur fyrir einstaklega  vel hannaðar  og faglega unnar sýningar: „With my best compliments for the extraordinary quality of your Museum. Very good design and also good museology.“Luis Juaris Medur ICOM félagi frá Brasilíu

Menningarminjadagur Evrópu 2007 verður haldinn föstudaginn 7. september til að vekja athygli almennings á gildi menningararfsins og að skapa vettvang til að almenningur geti kynnst sögulegu umhverfi sínu.Á Akureyri kynnir Haraldur Þór Egilsson sagnfræðingur sögu Akureyrarkirkju og gripi hennar milli 17:30 og 19:00.

Þann 29. ágúst, á 145 ára afmælisdegi Akureyrarbæjar, opnaði sr. Jón Aðalsteinn Baldvinsson vígslubiskup sýninguna Kirkjur Íslands, í Safnaðarheimili Akureyrarkirkju.  Sama dag komu út níunda og tíunda bindi samnefndrar ritraðar, sem gefin er út af Þjóðminjasafni Íslands, Húsafriðunarnefnd ríkisins, Fornleifavernd ríkisins, og Biskupsstofu. Tvö nýjustu bindin fjalla um friðaðar kirkjur í Eyjafjarðarprófastsdæmi. Minjasafnið á Akureyri og Byggðasafnið í Hvoli á Dalvík tóku þátt í útgáfu þeirra með því að leggja til greinaskrif og gamlar ljósmyndir af kirkjustöðunum.

Hin árlega draugaganga Minjasafnsins og Leikfélags Akureyrar var sú fjölmennasta í sögunni. Áætlað er að um 800 þáttakendur (þessa heims) hafi gengið út Aðalstrætið undir leiðsögn Þórs Sigurðarsonar.

Í tilefni af útkomu binda 9 og 10 í ritröðinni Kirkjur Íslands verður opnuð sýning miðvikudaginn 29. ágúst kl. 20.00 í safnaðarheimili Akureyrarkirkju um friðaðar kirkjur, gripi og minningarmörk í Eyjafirði, Skagafirði, Húnaþingi og á Ströndum. Þorsteinn Gunnarsson. Arkitekt, greinir frá Kirkjum Íslands og bindum 9 og 10 sem fjalla um Eyjafjarðarprófastsdæmi, en  Sr. Jón Aðalsteinn Baldvinsson vígslubiskup opnar sýninguna.Sýningin stendur til 29. september.

Sunnudaginn 26. ágúst verður kaffihlaðborð og lesið í bolla í Gamla prestshúsinu í Laufási. Sest verður að kræsingum og spádómum kl. 14 og stendur veislan til kl. 17.Gamli bærinn Laufás er opinn alla daga frá 9-18.